Само десет дена ја делат македонската ракометна репрезентација од премиерниот натпревар на ЕП 2018 против селекцијата на Словенија. Ракометарите работат со засилено темпо, а во следните два дена ќе ги имаат и двете контролни средби, против Саудиска Арабија и Србија во Белград, по што ќе се „шминкаат“ и последните детали од играта за пресметките во Загреб.
„Тренираме одлично и со нетрпение го очекуваме стартот на Европското Првенство. Првиот натпревар ќе биде многу важен, бидејќи Словенија ќе ни биде како патоказ, за тоа како ќе играме и што можеме да направиме на овој шампионат. Имаме напредок во играта во однос на последните натпревари, атмосферата во тимот е одлична и очекувам тоа да се одрази и врз нашите резултати“ – изјавува десното крило Гоце Георгиевски.
Дополнителна мотивација за македонските репрезентативци е фактот дека на последниот дуел со Словенија, на СП 2017 во Франција, претрпеа убедлив пораз од 22-29, меч на кој противникот на моменти делуваше и брутално во стартовите во одбраната.
„Тоа беше натпревар во кој бевме изненадени од агресивниот пристап на противникот, по што Словенија рано создаде предност и доминираше до крајот. Слободно можам да кажам дека таа лекција е научена, нема да ги повториме грешките од ланскиот меч. Свесни сме за квалитетите на противникот, а наша цел е да одговориме на свој начин, ние да го наметнеме нашиот стил на игра и да го диктираме темпото цели 60 минути“ – вели Георгиевски.
Во наш прилог оди и фактот дека Словенија ќе настапи без својот најдобар дефанзивец Матеј Габер, кој заработи повреда на вчерашниот тренинг.
„Габер им е многу важен играч и во нападот и во одбраната и неговото отсуство сигурно ќе претставува проблем за Словенија. Сепак, ние не треба многу да се фокусираме на тоа бидејќи Словенија е сериозна репрезентација добро покриена на секоја позиција, а Македонија треба да се фокусира на своето издание, да настојуваме да одиграме најдобро што можеме на ова ЕП“ – истакнува десното крило на македонската репрезентација.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
