Одлуката на ФИФА да го промени примарниот критериум за местото на табелите на Светското првенство во фудбал, ставајќи го меѓусебниот дуел пред вкупната гол-разлика, предизвика лавина од негативни реакции и страв од сериозни контроверзи во последното коло од групната фаза.
Критичарите предупредуваат дека овој систем предвреме го убива натпреварувачкиот дух. Веќе по првите две кола, дури девет репрезентации немаат за што да играат во последното коло, бидејќи некои се сигурно први, а други се математички елиминирани поради порази во меѓусебните мечеви.
Најголемиот скандал се заканува во Групата Ј, каде се создаде вистински парадокс помеѓу Австрија и Алжир. Бидејќи Аргентина веќе го обезбеди првото место, овие две селекции во меѓусебниот дуел ќе одлучуваат за втората позиција. Меѓутоа, поради вкрстувањето во нокаут-фазата, второпласираниот тим оди директно на главниот фаворит Шпанија, додека третопласираниот ќе добие значително полесен противник.
Спортските аналитичари алармираат дека двете репрезентации имаат отворен натпреварувачки интерес да загубат или да калкулираат. Така, би можело да се повтори фамозниот „Срам во Хихон“ од 1982 година, кога Австрија и Германија одиграа лажиран натпревар.
Фудбалската јавност веќе реагира со револт, обвинувајќи ја ФИФА дека со вештачките промени и проширувањето на турнирот ја уништува традиционалната драма каде секој гол во последната минута решаваше судбини.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
