Гостивар останува рамо до рамо со МЗТ Скопје на делба на врвот на прволигашката табела откако тимот на Марјан Србиновски рутински ја доби денешната средба со Вардар (77-68). Избраниците на Марјан Србиновски не одиграа на нивото на кое минатиот викенд среде Аеродром го совладаа МЗТ Скопје, но и она што го прикажаа на денешниот дуел беше сосема доволно за да се прокнижат посакуваните бодови.
„Црвено-црните“ изненадија со подобра игра на самиот почеток, отворајќи го натпреварот со водство од 2-9, но домаќините се разбудија од почетниот сон и ја добија првата четвртина со 21-17. Вториот период мина во израмнета игра, на одмор се замина со минимално водство на Гостивар од 35-33, а отпорот на гостите од Скопје беше скршен дури на почетокот од четвртата четвртина, во која гостиварци дојдоа до двоцифрена предност од 65-54 со тројката на Доналдсон, позитива што потоа рутински ја претворија во нова победа.
Џелетовиќ со 21 поен беше најдобар стрелец на Гостивар, одличен беше и Доналдсон, реализирајќи 16 поени, 10 скокови и шест асистенции. Кај Вардар во добро светло се покажаа Робев со 19 поени и Темелковски со дабл-дабл од 15 поени и 15 скокови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
