Италија не знае за пораз, Манчини блиску до рушење нови рекорди

Репрезентацијата на Италија синоќа славеше со 2-0 во Бугарија и со тоа го надгради успешниот почеток на квалификациите за СП 2022 година, откако ги отвори со победа против Северна Ирска со ист резултат.

Ова беше 24-ти последователен натпревар без пораз за Роберт Манчини на клупата на Италија и му недостасува само уште еден за да го изедначи учинокот на славниот Марсело Липи, кој од 2004 до 2006 година забележа 25 натпревари без пораз и го освои Светското првенство во Германија.

Од овие 24 натпревари, Италија на Манчини победи на 18. Во тој период, тие ја чуваа празната мрежа 17 пати, а на последните 14 настапи примија само три гола.

“Тешко е да се игра кога противникот игра со сите 11 играчи зад топката и чека контранапади. Додека не ги скршите, има многу малку простор за игра и гол”, објасни Манчини за проблемите на мечот со Бугарија.

Инаку, апсолутен рекордер е Виторио Поцо, кој во 30-тите години на минатиот век на клупата на Италија имаше 30 натпревари без пораз и освои две светски титули.

 

Се вчитува...