Низата од 13 едноподруго победи на Портланд запре синоќа во нивниот „Мода центар“ каде загубија од најдобриот тим во лигата, Хјустон со 111-115.
Триумфот на Хјустон дојде во финишот кога во клучните моменти создадоа предност од девет поени (104-113) која успеаја да ја зачуваат до крајот.
Незапирлив во победничкиот тим беше Џејмс Харден со 42 поени, додека на спротивната страна одличен беше Јусуф Нуркиќ со „дабл-дабл“ ефект од 21 поен и 11 скока.
Минесота славеше (123-109) против ЛА Клиперс на домашен терен и на тој начин ја продолжи грчевитата борба за плеј-оф во Западната конференција.
Минесота сега е седма со скор од 41-31, победа повеќе од Јута, а следат Денвер со 38-33 и Клиперси со 37-33.
Најзаслужен за победата на домашните беше Карл-Ентони Таунс со 30 поени, дополнети и со 10 скока и три асистенции. Одличен беше и Ендрју Вигинс со 27 поени.
Клиперси беа предводени од ДеАндре Џордан со 18 поени и 12 скока, Лу Вилијамс и Шон Килпатрик постигнаа по 15 поени.
Во останатите мечеви, Торонто славеше на гостувањето против Орландо со 86-93, Бостон беше подобар од Оклахома со 100-99, Њу Орлеанс го совлада Далас со 115-105 а Атланта славеше на гостински терен против Јута со 94-99.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА