Напаѓачот на Баерн и репрезентацијата на Англија, Хари Кејн, зборуваше за неговите шанси за освојување на „Златната топка“, истакнувајќи дека резултатите од минатата сезона зборуваат многу за неговата кандидатура.
Кејн ја освои тројната круна во Германија минатата сезона со Баерн, постигнувајќи 73 гола на 65 натпревари во дресот на клубот и репрезентацијата.
Поефикасен настап во една сезона имаше само Лионел Меси, кој во сезоната 2011/12 постигна неверојатни 82 гола на 69 натпревари.
„Комплицирано е. Никогаш не сакам да зборувам премногу за себе. Се што би рекол е дека минатата сезона беше неверојатна, и за мене лично и за целиот тим. Убедливо најдобрата сезона во мојот живот. Тие 73 гола, вториот најдобар настап во историјата на фудбалот, зборуваат сами за себе“, рече Кејн во интервју за „Марка“.
Тој додаде дека е горд на она што го постигнал, но исто така истакна дека победникот на Златната топка го одлучуваат гласачите.
„Исклучително сум горд и можам само да им се заблагодарам на моите соиграчи и на сите други што ми помогнаа да го направам тоа. Но, Златната топка не е во мои раце. Зависи од луѓето што гласаат. Јас само можам да кажам, ако 73 гола се малку, тогаш не знам…“, додаде англискиот напаѓач.
Кејн верува дека неговиот трансфер во Баерн, како и квалитетот на неговите соиграчи, му овозможуваат да има уште поголемо влијание врз играта.
„Фудбалот понекогаш е прашање на тајминг. Да се биде во Баерн, со одличен тим околу мене, ми овозможува да постигнувам многу голови и да уживам во желбата да му помогнам на тимот. Искрено, физички и ментално се чувствувам подобро од било кога. И морам да го искористам тоа, бидејќи ништо не е вечно“, рече Кејн.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
