Во првиот натпревар од второто коло во Суперлигата, кошаркарите на ТФТ за малку ќе прокоцкаа предност од 17 поени во последната четвртина, но го совладаа Скопје со 102-98 и го запишаа првиот триумф во новата сезона. КК Скопје ќе почека за прво славје сезонава бидејќи на стартот загуби од Кожув со 95:101.
Овој триумф воедно претставува реванш на ТФТ за ланската елиминација во полуфиналето од плејофот кога Скопје (тогаш Маџари) ја доби серијата и се пласира во големото финале.
Кошаркарите на ТФТ триумфот фуриозно го започнаа натпреварот, првата четвртина ја добија со убедливи 30:18.
Втората и третата четвртина завршија со речиси идентичен резултат, 22:23 беше во втората, а 22:22 во третата четвртина.
Во одлучувачките десет минути, влезе со предност од 74:63 и со тројките на Цветковски и Митревски замина на плус 17. Но. кошаркарите на Скопје не се предадоа, полека ја намалуваа предноста и на точно четири минути до крајот по трите слободни фрлања на Џексон, дојдоа до минус седум (88:81).
Луис ги реализира двете слободни фрлања за 90:81, а потоа погоди и за 92:83 на 140 секунди до крајот. Гостите и тогаш не кренаа бело знаме, направија серија од 0:7 и по тројката на Џонс на 67 секунди до крајот дојдоа до минус два (92:90).
Во одлучувачките моменти, лидер на ТФТ беше Сила кој со мини серија од шест поени донесе предност од 98:92. Џонс на 20 секунди до крајот возврати со тројка за 98:95, но точка на натпреварот стави Вајт со двете слободни фрлања за 100:95.
На пет секунди до крајот Џонс даде нова тројка и намали на 100:98. Точка на натпреварот стави Сила кој ги реализира двете слободни фрлања за конечни 102:98.
Цветковски со 24 поени и Сила со 23 поени и 15 скока беа најзабележителни кај ТФТ, додека во редовите на Скопје, Колин Паркер имаше дабл-дабл од 31 поен и 12 скока.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
