Енис Барди со македонската репрезентација се наоѓа во Ереван, каде утре речиси сигурно ќе биде стартер на гостувањето против Ерменија. Во таборот на Леванте со нетрпение го очекуваат враќањето на Барди назад во Шпанија, со оглед на најавите дека „експертот за слободни удари“ најдоцна во следните десет дена ќе потпише нов договор со својот клуб.
Актуелниот договор на Барди е со клаузула од 25 милиони евра, а токму тоа е причината поради која челниците на Леванте реагираа за час поскоро да го „врзат“ македонскиот репрезентативец на подолг рок. Новиот договор ќе има клаузула од 50 милиони евра, сума со која клубот од Валенсија се надева дека ќе ги оддалечи сите клубови кои досега покажуваа интерес за да го доведат Македонецот во своите редови.
Севилја беше клубот што во последниот период покажа сериозен интерес за ангажман на Барди, особено по најавите дека Унаи Емери планира да го доведе Евер Банега во Арсенал. Сепак, тешко е за верување дека клубот од Андалузија ќе плати 50 милиони за македонскиот интернационалец, исто како и останатите тимови што претходно најавуваа офанзива за ангажман на нашиот интернационалец.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
