Македонските одбојкари во супер-атмосфера пред утрешниот старт на Ф4 од Европската сребрена лига

Македонската одбојкарска репрезентација со утрешниот полуфинален меч против Финска од 16 часот во Будимпешта го стартуваат завршниот турнир од Европската сребрена лига. Валбжих, Варна, Гентофте, Скопје, Струмица, сега Будимпешта е на ред за македонските одбојкари кои во супер-атмосфера го очекуваат дуелот старите познаници Финците.

Откако влегоа во евролигашкото друштво, македонските одбојкари не пропуштија дефиле на завршен турнир. Годинава не е исклучок иако сите посакуваат крајот да биде поинаков и конечно на градите да засјае златниот медал. Четирите сребра се гордост, исто како и бронзата во Европската лига во 2014 година кога се играше во поинаков формат, но вистинска најава за наредната европска одбојкарска година кај нас, би бил токму триумф во Будимпешта. За остварена мечта којашто речиси цела денценија ги бранува чувствата на црвено-жолтите, утре во полуфиналето треба да падне Финска, а в недела подобриот од натпреварот меѓу домаќинот Унгарија и Романија.

Македонија има незаборавна победа против Естонија во полуфиналето на Европската лига и очекувано успеси над Австрија и над Данска. Во ерата на „сребрената лига“, значи од 2018 година досега, во фазата на најдобрите четири игравме само со Хрватска, со половичен ефект. Во седмото полуфинале ќе влеземе во биланс 4-2, а во третиот меч против Финците во последните три години со два освоени сета во идентичните порази со 3-1 на претходните два континентални самита. Финска е речиси целосно променета, со исти играчи на примачка дијагонала – Ронкаинен и Макинен. Ги нема Тервапорти, Керминен, Сивула, Сирила и Синконен во однос на пресметката лани во Тампере. Тимот е млад, но одлично селектиран, а искуството на Ѓорѓиеви, на Деспотовски, на Милев, на Маџунков, може да биде наша силна страна. Ние ги немаме Наков, поради семејни причини, и Михаилов поради здравствени проблеми, па единствено либеро ќе биде Милев. Значи, ќе играме со линијата која што ни ги донесе последните две победи со Романија и со Босна и Херцеговина.

Да се зборува за фаворити и за аутсајдери на завршен турнир е како дисонантен тон во музиката. Финците се 12-та, ние 24-та одбојкарска сила на континентот, но ние честопати сме играле за пркос, за себедокажување, за исполнети македонски срца. Утрешниот натпрвар, а и целиот завршен турнир во Европската сребрена лига е во таков контекст.

Се вчитува...