Јулијан Нагелсман доби отказ од Баерн Минхен, но веднаш стана јасно дека младиот стратег нема предолго да остане без работа бидејќи екпресно е поврзуван со неколку врвни амбициозни клубови ширум Европа.
Тој беше споменуван како опција во Реал Мадрид доколку си замине Анчелоти, Тотенхем веднаш го контактираше доставувајќи му и понуда, а според последните информации, сега Нагелсман е сериозна желба на Челси. Англиските медиуми денеска информираат дека екс-тренерот на Баерн бил забележан на преговорите со раководни луѓе на лондонски премиерлигаш.
Логично би било да се очекува тоа да е Тотенхем, клуб што е во потрага по нов тренер по смената на Антонио Конте, но според овие извори Челси е клубот што води во трката по Нагелсман. Германецот лично ги слушнал замислите на клупската управа на „сините“, тим што инвестираше убедливо најмногу пари во последната година во Премиер-лигата и му бил ветен дополнителен буџет за нови засилувања.
Американскиот газда и неговите соработници не се задоволни од сработеното од Грем Потер, па иако во бројни наврати му укажаа доверба се чини дека ќе го остават овој стратег да ја доврши сезоната, а потоа ќе доведат нов стручњак на „Стемфорд бриџ“. Прва желба е Нагелсман…
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
