Партизан по втор пат во само неколку дена се радуваше на триумф во српско вечно дерби против Црвена Звезда. По победата во Евролигата, овој пат избраниците на Жељко Обрадовиќ славеа и во АБА лигата со 98-87.
Црвена Звезда подобро го започна натпреварот и поведе со двоцифрена предност уште во првата четвртина (11-21), но како што одминуваа минутите домашните кошаркари го превземаа моментумот. Партизан не само што напарви целосен пресврт до полувремето туку успеа и да поведе со 47-36.
Предноста на „црно-белите“ се искачи и на +19 (68-49) во третата четвртина, но падот во концентрацијата го искористи Црвена Звезда која стигна до лесни поени па намали на едноцифрен заостанок пред одлучувачките десет минути (72-63). Во нив гостите во два наврати имаа негатива од два поседа (82-76), но на крилја на домашната публика избраниците на Жељко Обрадовиќ навремено ги консолидираа редовите и не дозволија неизвесен финиш.
Со 22 поени Камински беше прво име кај Партизан, додека него го следеше Аврамовиќ со 15 поени и 6 асистенции. Нејпир ја предводеше Црвена Звезда со 23 поени и 8 асистенции.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
