Спортската манифестација број еден во Охрид, Атлетскиот викенд Охрид трчаТ ќе го „скрши“ мразот што се однесува до уличните трки во Македонија и регионов, откако од Комисијата за заразни болести доби зелено светло за одржување на настанот од 28. до 30. август.
„Голема благодарност до Комисијата за заразни болести за начинот на комуникација и посветеноста заедно да го направиме тоа што е најголем приоритет за сите нас во овој момент, заштита, безбедност и сигурност на сите учесници на настанот. Одговорноста е голема. Охрид трчаТ ќе биде прва улична трка за оваа година во нашата земја и пошироко и навистина ни претставува голем мотив и предизвик, во вакви услови да го покажеме нашиот професионализам и визија за подоброто утре наше, на Охрид и на Македонија“ – изјави директорот на трката, Иван Цветкоски.
Бројот на учесници е ограничен на 500, по 250 на полумаратонот (21 километар) и 250 за рекреативната трка на 5 километри. Пријавувањето е отворено до 23 август, 23 часот и 59 минути доколку претходно не се исполни предвидениот одобрен број за учество. Сите учесници кои ќе се пријават до 20. август ќе си имаат ексклузивно право да си имаат име и презиме на стартниот број.
Пријавувањето е на официјалната страна www.ohridtrcat.mk, каде што има поделани информации за се што е поврзано со четвртото издание на Охрид трчаТ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
