На стадионот Македонски Лавови во Скопје успешно заврши меѓународниот турнир „Њу Старс 2026“, кој уште еднаш покажа дека детскиот фудбал носи посебна енергија, искрени емоции и пријателства што остануваат засекогаш.
Во организација на ФК Њу Старс, на турнирот настапија повеќе од 500 деца од различни клубови, градови и држави, во генерациите 2015, 2016, 2017 и 2018.
Преку организацијата на овој турнир, ФК Њу Старс, прослави и 15 години постоење — 15 години работа со млади фудбалери, создавање таленти и градење на препознатливата успешна приказна.
Меѓународниот турнир „Њу Старс 2026“ беше дел и од официјалниот АФТ календар, што му даде дополнителна тежина на целиот настан.
Титулите на овогодинешното издание ги освоија екипите на Овче Поле, Еуроспорт, Шампион Лесковац и домаќинот ФК Њу Старс.
Одличен настап и забележителен пласман остварија и екипите Академија 23, Смиљковски, Ак. Пандев, Марадона, Тетекс, Железара…
„Њу старс турнирот 2026“ уште еднаш потврди дека Скопје е важна точка на регионалната мапа на младински фудбалски турнири. Организацијата, атмосферата и големиот број насмеани деца создадоа вистинска спортска приказна, а од клубот домаќин испратија јасна порака дека продолжуваат уште посилно, со истата љубов кон фудбалот што ја градат веќе 15 години.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
