Поразот од Вардар во финалето од ЛШ ги направи челниците на ПСЖ уште порешителни во обидите да се искачат на врвот на европскиот ракомет. Така, покрај квалитетните засилувања што се носат „светците“ воедно ги задржуваат и своите најдобри играчи, па Микел Хансен денеска потпиша нов договор со ПСЖ со важност до 2022 година.
„Се чувствувам пресреќен. Мојата авантура со овој клуб почна пред пет години и ќе трае уште долго. Ја делиме истата желба за победа, ги сакам мојот клуб, соиграчите и градот. ПСЖ е вистинскиот клуб за мене да продолжат да се развивам, како играч и како човечко суштество“ – изјави Микел Хансен, кој наскоро ќе наполни 30 години.
И првиот оперативец на „светците“, Жан Клод Блан, не го криеше задоволството по потпишаниот договор со Данецот.
„Новиот договор со Микел Хансен само ја потврдува решеноста на нашиот клуб да атакуваме на врвни резултати и во следните сезони. Тој е симбол на нашиот клуб и ќе има клучна улога во успесите на ПСЖ во годините што следат“ – истакна Блан.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
