Турската јавност е шокирана од информацијата дека соиграчот на македонскиот репрезентативец Јани Атанасов во Бурсаспор, дефанзивецот Сехер Токташ го призна убиството на петгодишниот син.
Таткото на 23. април е хоспитализиран со синот на кого му е дијагностициран коронавирусот. Момчето било примено на одделението за интензивна нега, а два часа по приемот починало. Докторите како причина на смрта навеле тешка респираторна компликација предизвикана од коронавирусот.
Но, вистината исплива на површина 11 дена подоцна. Токташ сам се пријавил во полиција признавајќи дека го задавил детето.
„Ставив перница на лицето на мојот син, кој лежеше на грб. Цели 15 минути ја притискав перницата, додека мојот син цело време се бореше. Кога престана да дише, ја подигнав перницата. Тогаш почнав да викам по докторите да помогнат, како би отфрлил било каков сомнеж“ – вели фудбалерот во својата исповест, притоа и дополнително шокирајќи со своите изјави:
„Никогаш не го сакав мојот најмлад син од неговото раѓање. Не можам да објаснам зошто не го сакав. Единствената причина зошто го убив е затоа што не го сакав, но немам некоја ментална болест“.
31-годишниот Токташ е веднаш притворен. Според законот во Турција го очекува доживотна затворска казна.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
