Ивановски четврти на „Белиот крос“ во Белград

Најталентираниот македонски атлетичар Дарио Ивановски запиша нов извонреден резултат завршувајќи на 4. место на 50. Интернационален крос кантри натпревар „Белиот крос“ во Белград, што е најдобар резултат на овој крај во историјата на македонската атлетика.

На кросот кој е познат по стартот на сезоната за бројни елитни европски атлетичари, во силна конкуренција меѓу десеттина најдобри атлетичари од Балканот и од регионот, 19-годишниот Ивановски главната сениорска трка на 6.000 метри ја истрча со време од 18 минути и 35 секунди. Победи најдобриот унгарски крос натпреварувач, Ласло Грегор со време од 17 минути и 44 секунди, пред еден од најталентираните Балканци, Осман Јунузовиќ од БиХ со 17 минути и 51 секунда, е трет беше бронзениот од Европското првенство во крос за атлетичари до 23 години, Србинот Немања Церовиќ со време од 18 минути и 2 секунди.

Зад Ивановски остана и Унгарецот Бене Барнабаш, Олимпиец од Унгарија, победник на овој крос во 2013 година, како Велимир Бојовиќ од Србија кој во Македонија е препознатлив по убедливите победи на Охридскиот маратон.

„Сезоната ни почна навистина фантастично, согласно сите наши претходно поставени планови. Рекордот на 3000 метри во сала, моќните контролни трки на 1.500 и 3.000 метри за време на подготовките во Добрич, беа најава и за овој голем успех во Белград. Но, време за прослави нема. Веднаш продолжуваме со нов циклус од двонеделни подготовки на наше тло за Балканското и Европското првенство во сала кои ќе се одржат во Белград на крајот од овој месец и почетокот на март. Дарио дефинитивно е во извонредна форма, па со право очекувам и медал од Балканското првенство“ – вели од Белград за ЕКИПА, тренерот на Ивановски, Игор Јакимовски.

Јакимовски и самиот настапи на „Белиот крос“ во Белград освојувајќи го 24. место со време од 21 минута и 5 секунди. На кросот настапи уште еден македонски атлетичар, Милош Ранчиќ кој стигна до 8. место со време од 19 минути и 22 секунди.